मुंबई : रस्त्यावर गाडी चालवताना विनाकारण हॉर्न वाजवण्याची सवय अनेकांना असते. आपल्या या सवयीचा लोकांना किती त्रास होत असेल याचा विचार हे लोक करत नाहीत. म्हणूनच अशा लोकांना वठणीवर आणण्यासाठी आणि त्यांचे कान पिळण्यासाठी मुंबई पोलिसांनी एक नामी शक्कल लढवली आहे. त्याचा व्हिडिओ मुंबई पोलिसांनी आज सकाळी (३१ जानेवारी २०२०) ट्विटरवर शेअर केला असून, तो सहा तासांत लाखाहून अधिक जणांनी पाहिला आहे.
ही शक्कल नेमकी आहे तरी काय? विनाकारण हॉर्न वाजवण्याची वाईट सवय घालवण्यासाठी उपाय म्हणून मुंबईतील काही चौकांतील सिग्नलजवळ डेसिबल मीटर बसवण्यात आला आहे. जवळपास हॉर्न वाजवल्यामुळे होत असलेल्या ध्वनिप्रदूषणाची नोंद या मीटरमध्ये केली जाते. आवाज ८५ डेसिबलच्या वर गेला, की सिग्नल रिसेट होतो. म्हणजेच ‘रेड सिग्नल’चा कालावधी आणखी वाढवला जातो. त्याला पनिशिंग सिग्नल असे नाव दिले आहे. त्यामुळे साहजिकच वाहनचालकांच्या हातात चिडचिड करण्यावाचून काहीही राहणार नाही. असे काही वेळा झाल्यावर आपोआपच लोकांना चांगली सवय लागेल, अशी पोलिसांची अपेक्षा आहे.
सध्या छत्रपती शिवाजी महाराज टर्मिनस, मरीन ड्राइव्ह, पेडर रोड, हिंदमाता आणि बांद्रा या ठिकाणच्या काही चौकांमध्ये प्रायोगिक तत्त्वावर हा डेसिबल मीटर बसवण्यात आला आहे.
मुंबई म्हणजे घड्याळाच्या काट्यावर चालणारे शहर. इथे कुणालाही वेळ नसतो; पण म्हणून विनाकारण हॉर्न वाजवणे चुकीचेच. म्हणूनच, ‘सिग्नलला थांबण्यासाठी भरपूर वेळ तुमच्यापाशी असेल तर जरूर हॉर्न वाजवा,’ असे पोलिसांनी या व्हिडिओत म्हटले आहे. ही कल्पना तर सुंदर आहेच; पण तितकाच तो व्हिडिओही सुंदर आहे. यामुळे तरी विनाकारण हॉर्न वाजवणाऱ्यांच्या डोक्यात प्रकाश पडेल अशी अपेक्षा.
मुंबई पोलिसांच्या या कल्पनेला आणि व्हिडिओलाही सॅल्यूट. हा प्रयोग मुंबईपुरताच असला, तरी सर्व ठिकाणच्या नागरिकांनीच यातून योग्य तो धडा घ्यायलाच हवा.
